રાણી રૂપમતિ મસ્જિદ

ગુજરાતમાં સુલતાનના શાસન સમયે બનેલા ભારતીય અને ઇસ્લામિક સ્થાપત્યના સંગમનું એક બેનમૂન ઉદાહરણ રાણી રૂપમતી મસ્જિદ છે.

આ મસ્જિદ અને મકબરાનું પરિસર રાણી રૂપમતિને સમર્પિત છે જેની સાથે મહમૂદ શાહ બેગડાએ લગ્ન કર્યા હતા. ઘણા લોકો માને છે કે આ મસ્જિદનું નિર્માણ સુલતાન મહેમૂદ બેગડાએ કરાવડાવ્યું હતું જ્યારે અમુકનું માનવું છે કે તે 1500ની સાલમાં સુલતાન મુઝફ્ફર શાહના સમયે નિર્માણ પામી હતી.

રાણી રૂપમતિ મસ્જિદ અમદાવાદના મિરઝાપુર વિસ્તારમાં સેંટ ઝેવિયર્સ સ્કૂલ પાસે સ્થિત છે. તેમાં ગુજરાત સલ્તનતકાળના સ્થાપત્યની વિશેષતાઓ જેમકે પાતળા મિનારા, સપાટ છત પર બનેલા ગુંબજ, કોતરણી કરેલી ગેલેરી, ઉંચો કમાનાકાર મુખ્ય દરવાજો અને આરસનો મેહરાબ વગેરે જોવા મળે છે. મુખ્ય દ્વાર લંબચોરસ છે અને તેના ખૂણામાં કમળ આકારના ચંદ્રક જોવા મળે છે. નાના દરવાજાઓ પાસે ઝરૂખાઓની જોડી છે. પ્રવેશદ્વારની પાછળ સ્તંભ પર ટકેલા ગુંબજ જોવા મળે છે. આ મસ્જિદની દિવાલો સલ્તનત સમયના અન્ય સ્થાપત્યોની સરખામણીએ થોડી સપાટ છે. અત્યંત ભવ્ય રીતે કોતરાયેલી આધારભીંતો અને ખૂણીયાઓ દરવાજા સાથે એક કોન્ટ્રાસ્ટ બનાવે છે.

અહીં પરિસરમાં બે કબર છે.