સરદાર પટેલ સ્ટેડિયમ

સરદાર પટેલ સ્ટેડિયમ નવરંગપુરામાં સ્થિત છે જે આર્કિટેક્ટ ચાર્લ્સ કોરિયાની ડિઝાઇન અને મહેન્દ્ર રાજની ઇજનેરી કુશળતાનો એક રસપ્રદ નમૂનો છે.

1950ના સમયમાં બોમ્બે પ્રાંતે 80000 ચોરસ યાર્ડ જમીન ક્રિકેટ ક્લબ ઓફ અમદાવાદ (CCA)ને સ્ટેડિયમ બનાવવા માટે ભેટમાં આપી હતી. એક ટોકન ભાવમાં આ જમીન અમદાવાદ મ્યુનિસિપલ કોર્પોરેશનને સોંપવામા આવી હતી. તે સમયે અમદાવાદના મેયર શેઠ ચીનુભાઇ ચિમનભાઇએ આર્કિટેક્ટ ચાર્લ્સ કોરિયા અને ભારતના ખ્યાતનામ એન્જિનયરો પૈકી એક એવા મહેન્દ્ર રાજને સ્ટેડિયમ અને સ્પોર્ટ્સ ક્લબ ઓફ ગુજરાતની બિલ્ડિંગ બનાવવાનું કામ સોંપ્યું હતું. સ્ટેડિયમનું નિર્માણ 1966માં પૂર્ણ થયું હતું.

આ સ્ટેડિયમ મુખ્યત્વે રણજી ટ્રોફી જેવી ફર્સ્ટ ક્લાસ ક્રિકેટ સ્પર્ધાઓ માટે ઉપયોગમાં લેવાતું હતું. 25 નવેમ્બર 1981ના રોયજ ભારત અને ઇંગ્લેન્ડ વચ્ચે રમાયેલી પ્રથમ વન ડે મેચ આ મેદાન પર યોજાયેલી એક ઐતિહાસિક યાદગીરી છે.

1960માં ટાંચા સાધનો અને સંશાધનો હોવા છતા ચાર્લ્સ કોરિયા અને મહેન્દ્ર રાજે તેમના કૌશલ્યથી આ સ્ટેડિયમનું નિર્માણ પૂર્ણ કર્યું હતું. જીણી જોડાયેલી પ્લેટોની રચના નીચેથી ઉપર સુધી જઇને આખું માળખું બનાવે છે જેમાં દર્શકો માટેનું સ્ટેન્ડ અને 20 મીટર લાંબી છત બનાવવામા આવી છે. ક્રિકેટ સિવાય અન્ય કાર્યક્રમોનું પણ અહીં આયોજન થાય છે.