અષ્ટપદ દેરાસર

અષ્ટપદ દેરાસર એ હવેલી શૈલીનું જૈન મંદિર છે, જેમાં જૈન મંદિર શૈલીના કેટલાંક સુંદર સુશોભનો કરેલાં છે. આ મંદિર હરકુંવર શેઠાણી ની હવેલી નજીક અને દોશીવાડા ની પોલના અંતે સોનીની દુકાન અને જૈન શૈક્ષણિક સંસ્થાની બાજુમાં સ્થિત છે.

અષ્ટપદ દેરાસર ઇ.સ. 1856માં એક અગ્રણી જૈન વેપારી અને દાનેશ્વરી શેઠ મગનલાલ કરમચંદ દ્વારા બંધાવવામાં આવ્યું હતું. આ દેરાસરમાં સફેદ, લાલ અને કાળા આસરથી બનેલી અસંખ્ય મૂર્તિઓ છે, જેવીકે આદિશ્વર ભગવાન અને મહાવીર સ્વામીની મૂર્તિઓ, મંદિરના આશ્રયદાતાઓ અને શેઠ મગનલાલના ગુરૂની મૂર્તિઓ પણ છે.

દેરાસરના પરિસરમાં એક પ્રવેશ મંડપ, મુખ્ય દેરાસર, એક અન્ય મંડપ અને નંદેશ્વર દીપ મંદિર છે. રસ્તા તરફ પડતો દેરાસરનો અગ્રભાગ બે માળનો છે, જેમાં ચાર ઝરૂખાઓ છે. આ અગ્રભાગને નર્તક-નર્તકીઓ અને સંગીતકારોથી સુશોભિત કરવામાં આવ્યો છે. સીડીઓ ચડીને ઉપરના આંગણામાં જાઓ તો ત્યાં આરસનું બનેલું મંદિર છે. નંદેશ્વર દીપ મંદિર તેની ઉપર રહેલા વિશાલ શિખરથી ઓળખાઈ જાય છે.