દયાભાઈ મહેતા હવેલી

દયાભાઈ મહેતા હવેલી એ અમદાવાદ શહેરમાં આવેલું એક ઐતિહાસિક ઘર છે. સિટી હેરિટેજ સેન્ટરની મદદથી તેને રિસ્ટોર કરવામાં આવ્યું હતું. આ ઘરમાં મ્યુઝિયમ કલેક્શનનો સંગ્રહ કરવામાં આવ્યો છે, જેમાં આઝાદી પહેલાના સમયના ફોટાઓ અને કલાકૃતિઓનો સમાવેશ થાય છે.

આ હવેલી શ્રી દયાભાઈ મહેતાનું ઘર હતું, જેઓ એક વકીલ હતા અને કેટલાક રજવાડાંઓના દીવાન હતા. સ્વામી વિવેકાનંદજી, મહાત્મા ગાંધી અને અન્ય નેતાઓએ આ ઘરની મુલાકાત લીધી હતી.

આ હવેલી દેસાઈની પોળમાં આવેલી છે. દેસાઈની પોળ ભવ્ય વારસાથી સમૃદ્ધ છે, જેમાં સ્વાતંત્ર્ય સેનાનીઓ અને રાષ્ટ્રવાદીઓ સાથે સંકળાયેલા અનેક ઘરો આવેલાં છે અને લાકડાની શ્રેષ્ઠ કારીગરી સાથે કેટલીક સુંદર હવેલીઓ પણ આવેલી છે. આ હવેલીમાં એક મ્યુઝિયમ પણ આવેલું છે, જેને સમયાંતરે મુલાકાતીઓએ માટે ખુલ્લું મૂકવામાં આવે છે. મુલાકાતીઓ ત્યાં વિવિધ કલાકૃતિઓ, જૂના વાસણો, હવેલીના માલિકના પરિવારના તેમજ મહાત્મા ગાંધી જેવા નેતાઓના જૂના ફોટાઓ, આઝાદી પહેલાના સમયના ન્યૂઝપેપર્સ, ભારતના નકશા પર ભારત માતાને દર્શાવતું એક જૂનું પેઇન્ટિંગ અને અન્ય ઘણી વસ્તુઓ જોઇ શકે છે.