હરિપ્રસાદ મહેતા બંગલો – જગદીપ મહેતાનું હેરિટેજ હાઉસ

જગદીપ મહેતાનું હેરિટેજ હાઉસ એ અમદાવાદના પ્રથમ હોમસ્ટેમાંનું એક છે. અહીંયા રોકાણ માટે ઉતરતા મુસાફરો અને અતિથિઓ કોટ વિસ્તારમાં આવેલા પોળજીવનની ઝાંખી જોઈ શકે છે.

આ હેરિટેજ હાઉસ તે ઘરોમાંનું એક હતું, જેની માલિકી તે સમયના નાગર બ્રાહ્મણ વિસ્તૃત (એક્સટેન્ડેડ) પરિવારની હતી. મોટા સુથારનો વાડો વિસ્તાર તેમજ ખાડિયાની આસપાસના વિસ્તારોમાં આ પરિવારના ઘણા ઘરો હતા. ત્યારબાદ આ ઘર જગદીપ મહેતાએ લઇ લીધું. તેમણે તેને પુનઃસ્થાપિત કર્યું અને તેનું નવીનીકરણ કર્યું.

આ ઘરના અગ્રભાગમાં પરંપરાગત સ્થાપત્ય સાથે યુરોપિયન પ્રભાવોનું સંયોજન જોવા મળે છે. આ હેરિટેજ હાઉસમાં અમદાવાદની હવેલીઓની લાક્ષણિકતાઓ પણ જોવા મળે છે, જેમકે આ ઘરમાં એક ખુલ્લું આંગણું પણ છે, જેને ચોક કહેવામાં આવે છે અને અહીંયા તમે ઐતિહાસિક વોટર હાર્વેસ્ટિંગ સિસ્ટમ એટલે કે જળસંચય વ્યવસ્થા પણ જોઇ શકો છો.

ઘરના માલિકો રૂમો ભાડે આપે છે અને વિવિધ પ્રકારના સાંસ્કૃતિક આયોજનો કરે છે, જેવાં કે કૂકિંગ લેસન્સ, પરંપરાગત સંગીત, પરિવાર સાથે વાતચીત અને પાડોશીઓની મુલાકાત વગેરે.