રાણી સિપ્રીની કબર

રાણી સિપ્રીનો મકબરો આસ્ટોડિયા ગેટ પાસે સ્થિત છે. અમદાવાદમાં આવેલી મસ્જિદો પૈકી આ મસ્જિદ સ્થાપત્યનો એક અભૂતપૂર્વ નમૂનો છે. તેને મસ્જિદ-એ-નગીના પણ કહેવાય છે. જેમ્સ ફર્ગ્યુસને તેને વિશ્વની બેનમૂન ઇમારતો પૈકી એક ગણાવી હતી.

રાણી સિપ્રીની મસ્જિદનું નિર્માણ 1514માં રાણી શુભારાય જેમને રાણી સિપ્રી અથવા રાણી અસની તરીકે ઓળખવામા આવે છે તેમના આદેશ પર કરવામા આવ્યું હતું. તેઓ સુલતાન મહેમૂદ બેગડાના પત્ની હતા અને એવું કહેવાય છે કે કોઇ ગુના બદલ જ્યારે સુલતાને તેમના દીકરાને મૃત્યુદંડ આપ્યો ત્યારે તેમણે આ મસ્જિદનું નિર્માણ કરાવડાવ્યું હતું. અત્યારે રોડ પહોળો કરાતો હોવાથી ત્યાં ફેન્સિંગ પણ કરી દેવામા આવ્યું છે.

આ પરિસરમાં મકબરો છે જેમાં રાણીની કબર મસ્જિદની સામે છે. મકબરામાં ઉપર ચોરસ આકાર પર મોટો ગુંબજ છે જેમાં બહાર 20 સ્તંભ અને અંદર 12 સ્તંભ સ્થિત છે. 

 રાણી સિપ્રીની  દિવાલો પર ખૂબ સુંદરતાપૂર્વક કોતરણી કરીને જાળીઓ બનાવવામા આવી છે. આ મસ્જિદમાં ઘણી હિન્દુ કોતરણીઓ પણ જોવા મળે છે. પૂર્વ તરફનો ભાગ ખુલ્લો છે જ્યારે પશ્વિમમાં દિવાલો પર સુંદર કોતરાયેલી જાળી જોવા મળે છે. મહેરાબ પણ ખુબ સુંદર છે અને તેમાં ગુજરાતી શૈલીનો પ્રભાવ જોવા મળે છે. આ મસ્જિદમાં ખૂબ બારીકાઇથી કોતરેલો મિનારો છે જેને  ભૂમિતિની દ્રષ્ટિએ સુદર રીતે આકાર અપાયેલો છે.