માણેક ચોક

તે અમદાવાદની સૌથી વ્યસ્ત બજાર છે. ઐતિહાસિક માણેક ચોક, બુલિયન, સોના અને ચાંદીના માર્કેટ જાણીતો છે. રાત્રે તે સ્વાદરસિકો માટે સ્વર્ગ બની જાય છે કારણ કે અહીં રાત્રિ બજાર ભરાય છે જેમાં ખાણીપીણી અને આઇસક્રીમના સ્ટોલ મોડી રાત સુધી ચાલુ રહે છે.

માણેકચોકનું નામ સંત માણેકનાથ પરથી પડ્યું છે જેઓ અહીં રહેતા હોવાનું માનવામા આવે છે. વાયકા પ્રમાણે જ્યારે સુલતાન અહેમદ શાહ અમદાવાદનું નિર્માણ કરી રહ્યા હતા ત્યારે રાત્રે માણેક બાબા ચાદર વણતા અને તેમનું બાંધકામ ધ્વસ્ત થઇ જતું. સુલતાને માણેકબાબાને વિનંતિ કરી અને શહેરના નિર્માણમાં યોગદાન માંગ્યુ અને આ સ્થળનું નામ તેમના નામથી રાખવામા આવ્યું.

માણેકનાથ મંદિર ચોકની બાજુમાં છે. સવારે માણેકચોકમાં પશુઓના ચારા, શાકભાજી અને ફળોની ખરીદી માટે મોટી સંખ્યામાં લોકો અહીં પહોંચે છે. ભારતની સૌથી મોટી સોનાચાંદીની માર્કેટ આખો દિવસ અહીં ચાલુ રહે છે. સાંજે ખાણીપીણીના વિક્રેતાઓ સ્ટોલ નાખીને તેમનો વ્યવસાય કરે છે. અમુક વેપારીઓનું માનવું છે કે આ મંદિરો, મસ્જિદ અને ધાર્મિક સ્થાનકોની કૃપા તેમના પર છે. અહીં આસપાસમાં જાણીતા સ્થળો, બજાર અને પોળને પણ માણી શકાય છે.