દીવાનનો બંગલો

ગાયકવાડ હવેલી નજીક સ્થિત દીવાનનો બંગલો બે માળનું એક આકર્ષક હેરિટેજ હાઉસ છે. વિસ્તૃત કાદરી પરિવાર બંગલાની માલિકી ધરાવે છે અને પરિવારના કેટલાક સભ્યો હજુ પણ આ મકાનના પરિસરમાં રહે છે. પરિવારના ઇતિહાસના પડઘા બગદાદમાં પડે છે. તેઓ એક સ્કૂલ ચલાવે છે અને નજીકમાં આવેલા એક પબ્લિક પાર્કની સારસંભાળ પણ કરે છે.

દીવાનનો બંગલો રાધનપુર નવાબના દરબારના દીવાન દ્વારા 1800ના દાયકાના મધ્ય ભાગમાં બંધાવવામાં આવ્યો હતો. આ ઘરની ડિઝાઈન એક અંગ્રેજ આર્કિટેક્ટે કરી હોવાનું માનવામાં આવે છે. મોટાભાગનું સ્થાપત્ય ઇન્ડો-ગોથિક શૈલીનું છે, પરંતુ તેમાં કેટલાક ગુજરાતી તત્વો પણ જોવા મળે છે, જેમકે લાકડાના ઝરૂખા.

બંગલાના પ્રવેશદ્વારથી શરૂ થતો ડ્રાઈવવે વોટર ફીચર્સ એટલે પાણીની વિશેષતાઓ ધરાવતા એક બગીચાની આસપાસ દોરી જાય છે, જેમાં ફુવારાવાળું એક નાનું તળાવ પણ આવેલું છે. બંગલાની ઝાડીઓમાં ઘણીવાર ચકલીઓ જોવા મળે છે. સ્તંભો, ગોથિક બારીઓ, કમાનો અને એક વિશાળ લાકડાના ઝરૂખાવાળી બાલ્કની સાથે બનાવવામાં આવેલા મકાનના સફેદ રંગના અગ્રભાગની સ્થાપત્યશૈલી ધ્યાનાકર્ષક છે.

બંગલાના દરવાજા રિસેપ્શન તરફ દોરી જાય છે, જ્યાં કોલોનીઅલ પિરિયડ એટલે કે વસાહતીકાળનું ફર્નિચર રાખવામાં આવ્યું છે. અહીંથી તમે ડાયનિંગ રૂમમાં જઇ શકો છો જ્યાં કોતરણીકામ કરેલું લાકડાનું ફર્નિચર, આરસનું બેઝિન અને એક વિશાળ ઝુમ્મર છે. ઘરના પાછળના ભાગમાં આવેલા હોલમાં જૂના ફોટાઓ લગાવવામાં આવ્યા છે અને હોલની ખુલ્લી બાજુની સામે એક આંગણું અને બગીચો આવેલા છે. બંગલાના ઉપલા માળે વ્યવસ્થિત કદના બેડરૂમ્સ આવેલાં છે. આ બંગલાને એક હેરિટેજ હોટલ તરીકે ચલાવવામાં આવે છે, પણ આ લખાય છે ત્યારે કોવિડ-19 મહામારીને કારણે હાલ આ બંગલો બંધ છે.