ઢાલગરવાડ

ઢાલગરવાડ એ અમદાવાદનું સૌથી વ્યસ્ત કાપડ અને વસ્ત્ર બજાર છે. તે ભદ્ર પ્લાઝાની નજીકમાં સ્થિત છે અને એટલા માટે આ બજાર ઘણા ઐતિહાસિક સ્મારકોની એકદમ નજીક આવેલું છે.

અમદાવાદના કોટ વિસ્તારનું પ્લાનિંગ ઐતિહાસિક રીતે કરવામાં આવ્યું હતું, જેથી શહેરનો ટ્રાફિક મુખ્ય રસ્તા પર દોડતો રહે અને અન્ય પ્રવૃત્તિઓ મુખ્ય રસ્તાને સંલગ્ન નાના રસ્તાઓ પર થતી રહે. મુખ્ય રસ્તામાંથી જ નાના-નાના અન્ય રસ્તાઓ નીકળે છે, જે લોકોની ચોક્કસ પ્રકારની ખરીદીની જરૂરિયાતને પૂર્ણ કરે છે. આ તમામ બજારો હવે ખૂબ વ્યસ્ત બજારો બની ગયાં છે અને દરેક બજારે કોઇ એક ચોક્કસ પ્રોડક્ટ અથવા માલના પ્રકારમાં નિપુણતા અને ખ્યાતિ પ્રાપ્ત કરી છે, જેમ કે, લોખંડ બજાર લોખંડ અને સ્ટીલની પ્રોડક્ટ્સ માટે પ્રખ્યાત છે, લાકડા બજાર લાકડા અને સુથારીકામ માટે પ્રખ્યાત છે, દવા બજાર જાતજાતની દવાઓ માટે પ્રખ્યાત છે, દાણા બજાર અથવા ચોખા બજાર વિવિધ અનાજો અને કરિયાણા માટે પ્રખ્યાત છે, ગોરગલી ગોળના વેચાણ માટે પ્રખ્યાત છે, ચાંદલાપોળ ઘરેણા માટે પ્રખ્યાત છે, બિસ્કિટ ગલી બેકરી આઇટમ્સ માટે, રમકડાં બજાર વિવિધ પ્રકારના રમકડાંઓ અને કલાકૃતિઓ માટે પ્રખ્યાત છે. કાપડ અને વસ્ત્રઓ માટેના મુખ્ય બજારોમાં રેવડી બજાર, રતનપોળ અને ઢાલગરવાડનો સમાવેશ થાય છે.

ઢાલગરવાડના રસ્તાને કિનારે આવેલી ઢગલાબંધ દુકાનો અને રસ્તાને છેડે બેસતા ફેરિયાઓની સંખ્યા તમને આશ્ચર્યમાં મૂકી દેશે. અહીંયા તમને વિવિધ પ્રકારના કાપડ અને વસ્ત્રો જોવા મળશે, જે મોટાભાગે શહેરમાં બીજે ક્યાંય પણ મળતા કાપડ કે વસ્ત્રોથી ઓછી કિંમતે મળી જતા હોય છે. અહીંયા તમને વિવિધ વસ્ત્રો, બાળકો માટેના કપડાં, સાડીઓ, ભારતના દક્ષિણના રાજ્યોમાંથી સુતરાઉ કાપડ, રાજસ્થાનના પ્રિન્ટેડ કાપડ અને અન્ય ઘણા પ્રકારના કાપડ મળશે. તમે શર્ટ અને સુટ બનાવવા માટે મીટરના ભાવે પણ કાપડ ખરીદી શકશો. નાનકડી શેરીઓમાં આસપાસના ઘરોમાંથી અથવા કામ કરવાની જગ્યાઓમાંથી સિલાઈકામના મશીનનો અવાજ અથવા ભરતકામના મશીનનો અવાજ પણ તમારા કાને પડશે.